Роземак

Ден на екологијата; Ден на пролетта

Розе — Wed, 22 Mar 2017 18:14:07 GMT

На ден 21.03.2017 година, во ООУ„ Единство“, Октиси се одбележа Денот на екологијата и Денот на пролетта.Учениците, наставниците, вработените од ООУ,,Единство", Октиси сериозно ги сфаќаат еколошките проблеми и секојдневно преку низа активности се трудат да придонесат за здрава животна средина и здрав живот.

Оваа година, Денот на екологијата се одвиваше со голем број активности насочени кон уредување на училишниот двор, училиштето и неговата околина.

Акцијата координирана од директорот на училиштето, Алил Рочи опфати неколку значајни сегменти.

Вредните раце на учениците засадија прекрасни рози и разни цвеќиња во училишниот двор и парк. Нашите вработени помогнаа да се засади нова трева во училишниот парк. Омиленото катче на нашите ученици се ревитализираше со фарбање на играчките за рекреација, а нишалките беа подновени и повторно подготвени за најмладите ученици.

Во нашиот парк, сега секој ќе може да се одмори на реновираните клупи, поправени и офарбани.

Во исто време, во училниците течеше акцијата за чистење и средување на клупите, столчињата и училишниот инвентар. Навистина, вредни се рацете на нашите ученици.

Победници на изборот за Нај ООР наставници за 2015 година

Розе — Wed, 03 Feb 2016 18:12:16 GMT

На изборот за Нај ООР наставник за 2015 година, кој траеше до 31 јануари 2016 година, во кој учествуваа 9 наставници, а својот глас го дадоа 589 гласачи, за Нај ООР наставници беа избрани:

– Роза Китрозоска, ООУ „Единство“ Октиси, Струга – изгласана од членовите на Алијансата за ООР

-Тања Метикош, ООУ „Дане Крапчев“ Скопје – избрана од стручна жири комисија.

Наградата за победниците на изборот е учество на втората Едуконференција за наставници и информатичари 2016 која ќе се одржи во периодот 1 – 3 април, 2016 година во Хотел Дрим, Струга.

Линк до официјалното известување- ОТВОРЕНИ ОБРАЗОВНИ РЕСУРСИ

Написот на ВЕБ ОХРИД

Среќна Нова 2016 година!

Розе — Wed, 30 Dec 2015 16:30:11 GMT

Среќна Нова 2016 година! Да ја испратиме старата година и со надеж да ја дочекаме новата 2016 година. Старата година ќе ја паметиме по многу успеси, активности награди. Работевме вредно и благодарни на се` што постигнавме. Новата 2016 година нека биде посреќна и поуспешна!

Нашиот настан -Hour of Code

Розе — Tue, 15 Dec 2015 17:38:35 GMT

10.12.2015 г.Октиси

ОПИС НА НАСТАНОТ

-Запознавање со настанот-поврзување со нашиот настан за Неделата на кодирањето;

Линк: http://rozemak.ucoz.com/news/nedela_na_kodira_eto_

10_18_oktomvri_2015_g_codeweek_eu_2015/2015-10-15-61

-Разгледување и дискусија : https://code.org/

-Прашања и одговори на учениците;

-Игра-Кодираме во нашата училница:

Цел: Да се сфатат основите на кодирањето;

Тек на играта: секој квадрат на подот означува едно движење; даваме инструкции и се движиме низ училницата. Столчињата се блокови што ги уништуваме-ја претставуваме играта Minecraft со цел полесно совладување на следниот предизвик- кодирање и добивање сертификат.

-Учениците кодираат со помош на наставникот;

ЗАБЕЛЕШКА: Поради технички проблеми-со компјутерите, учениците индивидуално ја завршија дадената задача дома. Ги запознаа и своите домашни(сестри, братчиња, родители...).

ЗАКЛУЧОК: Следните активности ќе бидат насочени кон изработување игра со граматички предизвик(македонски јазик)

Лични творби на наши читатели

rangelovalina21 — Sun, 15 Nov 2015 12:21:29 GMT

Нашите посетители се многу талентирани за пишување. Прочитајте ја творбата на Рангелова Лина. Пишувајте и вие за есента и испраќајте ги вашите творби. Со задоволство ќе ги објавиме.

Пристигна есента во мојот крај и како најдобар сликар ја обои природата. Наслика прекрасен пејзаж со црвена, портокалова, кафеава и златно-жолта боја.Лисјата паѓаат од дрвјата, ветрот ги носи, а тие танцуваат низ воздухот. Шушкаат под нашите нашите нозе, се ронат и прават прекрасен килим низ кој минуваат безброј патници.
Небото е тмурно и сиво, а јата птици црцорат тажно и итаат кон топлиот југ. Паѓаат дождовни капки и како кристали се тркалаат низ чадорчињата. Златно-жолтата боја блеска на сонцето кое срамежливо ѕирка меѓу облаците.
Есента мириса на зрело овошје, кошниците се полни со јаболка, круши, грозје, дуњи. Се шири мирис на зимница од дворовите, се слушаат удари од секири. Орачите ги ораат нивите, натежнале лозјата од зрели и вкусни гроздови. Домаќините брзаат да ги наполнат визбите со вино и ракија.Во гората животните се спремаат за зимски сон, ги подготвуваат своите легла.
Ете, таква е есента, шарена, разиграна и миризлива од есенските овошки. Стариот сликар ја наслика есента, а потоа ќе ни наслика нови бели бисерни-блескави бои.

Нашата читателка, Калија нѐ почести со своите творби. Прочитајте ги!

Чувство на љубов

Да живееш... Да копнееш... Да се будиш секое утро со помислата дека си некому потребен... Најубавото чувство. Тоа што нè исполнува. Ни го прави животот посебен и единствен. Единствен, на начин на кој некогаш бил само дел од нашите сонови. Што е тоа? Кое е тоа чувство кое може да ги помине сите препреки само за да спои две срца? Да, тоа е љубовта! Љубов – толку мало зборче, а сепак исполнето со многу емоции, чувства... Исполнето со огромна светлина и радост, но понекогаш и тага. Љубовта постоела отсекогаш и претставувала чувство без кое ако размислам, човечкиот род не би можел да опстане. Без разлика на времето, местото и положбата во која се наоѓале, луѓето секогаш биле способни да дадат љубов, па дури и да го дадат својот живот за оние кои ги сакале.
Што е тоа љубов? Понекогаш ќе се прашаме. Всушност мислам дека тоа е најчесто поставувано прашање. За некого љубовта претставува само болка и страдање, додека за некого претставува најубавото и најпрекрасното нешто на светот, единствена причина за живеење. За мене љубовта е еден вид пријателство, да бидеш со тој што го сакаш во добро и во зло, да растете заедно, да плачете, да се смеете... Да ги поминувате заедно најубавите моменти. Да си верувате еден на друг, но пред се да верувате во вашата љубов. Едноставно, тогаш целиот свет е само ваш, а на него постоите само вие двајца и нормално вашата љубов.
Се уште не можам да зборувам за љубовта и нејзината убавина, но сепак мислам дека таа е дел од секого и дека декој има право да ја почувствува. Пролетта е време за вљубување. Па затоа се вели дека на вљубените целиот живот им е пролет. Љубовта е најубавото нешто на светот. Кога сум вљубен чувствувам дека целиот свет е мој, а светот е обоен со розова боја, прекрасна волшебна боја... Љубовта знам колку е слатка, но знам и колку боли. Не се откажав од љубовта, бидејќи таа доаѓа кон оние кои веруваат во неа. И секој пат кога ќе ги осетам оние пеперутки во стомакот, ја осеќам љубовта на своја кожа, сите убави мигови, се осеќам најубаво. Па дури и кога нема љубов во мојот живот, остануваат спомените од нешто поминато, спомени кои ми го одржуваат животот. Љубовта е најсилната сила. Сила која го врти светот. Во школо не учат за некакви сили кои не опкружуваат, но дали се тие и најважни? Тие се сили кои ги проучуваат некои научници, кои го трошат својот живот затворени во својата работна соба, проучувајќи ги законите и она што не опкружува. Но ниту еден човек, ниту еден научник или слично не може, не е способен да ги открие сите закони на љубовта. На таа сила која според мене има најголема моќ.
Но љубовта е секогаш непредвидлива. Иако ни ја носи најголемата среќа во животот, знае да донесе и болка, тага и мнгоу солзи. Но сепак тој баланс помеѓу среќата и тагата е неопходен во нашите животи и сето тоа се надминува. Најбитна е убавината на љубовта, за која доколку е вистинска вреди да се ризикува животот. Дали само еден цвет ја прави ливадата шарена? Дали само една ѕвезда го прави небото чудесно? Само еден лебед ли ги прави водите на езерото романтични? Започнав со мелодијата на пријателството, а завршувам со песната на љубовта. Љубовта е како музичка кутија која е затворена со катанче, а клучот на тоа катанче го има тој што го сакаме. А душата, таа претставува огледало, при секој поглед во него се гледа нашата љубов. Ако си го отвориме срцето, љубовта ќе ни ја отвори душата. Кога музиката од музичката кутија допира до мојата душа, започнува љубовта. А, кога ќе запре музиката се крши огледалото и се губи клучот – тука лежат одговорите на сите прашања. Неверствата и лагите ја трујат љубовта. Помалите лаги и неверства бавно ја уништуваат љубовта. Големите лаги и неверства ја уништуваат побрзо. Љубовта не значи само болка и повредување. Љубов значи: Љубовта да ја подариш на оној што мислиш дека му е потребна и искрено и безусловно да го сакаш. Љубовта е најубавото нешто на светот, но само ако е возвратена! Секогаш носи љубов во твоето срце, затоа што само така ќе бидеш среќен и ќе те сакаат. А тоа, да бидеш сакан е најубавото нешто што може да ти се случи. Деновите потрошени без љубов, се залудно потрошени денови... Тој што те сака, и ти сакај го, но тој што те повредува, засекогаш избриши го од твојот живот. Ако си во мојот живот само за да си играш со моите чувства, не си го губи времето и оди си. Но, ако си тука да ме сакаш и да ми покажеш што е вистинска љубов, можеш да останеш засекогаш.

Планетата Земја

Денес планетата Земја е многу загадена а воедно и уништена. Тоа е така поради човекот. Човекот е најголем загадувач на планетата Земја, неразмислувајќи дека и самиот себе си наштетува.
Водите денес се многу загадени, како резултат на бродовите кои испуштаат нафта и бензин. Живиот свет не може да живее во таква средина и умира. Друг проблем е што постојано се сечат голем број на дрвја, а тие се белите дробови на нашата планета. Улиците се полни со отпадоци поради луѓето кои се толку мрзливи што отпадокот го фрлаат на сред улица, наместо во корпа за ѓубре. Фабриките од оџаците испуштаат чад што го загадува воздухот.
Зошто дозволуваме да живееме во ваква средина кога можеме да преземеме нешто за да живееме во почиста и поздрава околина. За да се постигне ова, не треба да се сечат дрвјата туку напротив,да се засадуваат уште повеќе. Да не се фрлаат отпадоци насекаде кога има корпи за нив. Да се стават филтри на оџаците од фабриките...
Едноставно да се грижиме за нашата планета бидејќи таа ни е едниствена и НЕМАМЕ РЕЗЕРВНА ПЛАНЕТА!!!

Недела на кодирањето/CodeWeek EU, 2015

Розе — Thu, 15 Oct 2015 19:16:50 GMT

Ние не можеме без нов предизвик. Во рамките на Неделата на кодирање,10-18.2015 г. CodeWeekEU се соочуваме со можноста да научиме нешто ново-да кодираме!

Идејата произлезе од самите ученици, од прашањето: Како да се совладаат некои содржини по јазик и литература што не се толку „атрактивни“?

Од 16 до 22 октомври, Октиси, Македонија ќе се обидеме да кодираме, да се забавуваме и да го најдеме вистинското место на кодирањето на нашите часови.

Повелете, ве очекуваме!

10 часот е времето за старт. Да кодираме!

Прочитајте за Европската недела на кодирање http://codeweek.eu/

Нашиот настан на мапата > Ние кодираме!

Петок, 16.10 2015 г.

Првите насоки ги добиваме од големиот број материјали што се наоѓаат на интернет.

Учениците се како и секогаш подготвени за соработка, а наставничката поставена пред нов предизвик: Да кодираме, да учиме, да се забавуваме!

Создадовме свој јазик користејќи ги нашите раце како знаци

Изненадувачки, или не, децата одлично се снајдоа во новата улога.

И ова не е се`, бидете тука, ќе има уште содржини!

На оваа страница може многу да се научи. Погледнете!https://studio.code.org/

Понеделник, 19.10. 2015 г.

Вредни сме, вредни, погледнете го проектот што го изработи ученичката Тамара Дишлијеска

Започнува летниот распуст! :-)

Розе — Thu, 11 Jun 2015 15:42:41 GMT

Помина уште една учебна година. Програмата ја реализиравме, вредно работевме, учествувавме на натпревари (училишни, државни, меѓународни), добивавме награди (на што сме посебно горди). Тестови, писмени, домашни задачи, проектни активности... екстерно проверување.

Не учевме цело време, бевме и на екскурзија!

Горди сме на нашите драмски актери кои својот талент го покажаа натпреварувајќи се меѓу себе.

Нашата наставничка учествуваше на Меѓународната едуконференција „Пријатели на образованието“ (24-25 јануари 2015 г, Струга) каде со своите постери претстави дел од нашите активности.

Се` објавувавме на нашата веб страница Роземак и на блогот со исто име.

На сите посетители и следачи на нашите е-информатори им благодариме!

Ви посакуваме пријатен и весел летен распуст! Дишете чист воздух, јадете здрава храна, уживајте во вашиот одмор! Пливајте, радувајте се! Прочитајте интересна книга!

Се гледаме следната 2015/ 2016 година!

Приредба, Ден на просветителите

Розе — Fri, 22 May 2015 21:08:48 GMT

Во чест на нашите просветители, Кирил и Методиј, денес(22.05.2015 г.) се одржа приредба. Драмските актери, хорот и оркестарот се претставија со своите изведби. Наши гости беа наставници и ученици од с. Делогожда, нашето партнер училиште во рамките на Проектот за меѓуетничка интеграција. Денот беше исполнет со голем број активности од екологијата, спортот, географијата и историјата. Успешниот ден беше заокружен со нашата приредба.

Следат слики од приредбата( сликани со мобилен телефон, м.з.)

Хорот и оркестарот под раководство на наставникот Климе Матоски

Директорот Алил Рочи со директорот на партнер училиштето

Наставничката Роза со дел од наградените ученици

Извонредните актери во драматизацијата „Бардачиња“

Драмска игра „ Лошите снаи“

Убаво е да се види, ама уште поубаво да се доживее возбудата на учениците по успешно завршената приредба. Ви благодариме, драги ученици! Честит празник!!

Драмски натпревар

Розе — Sat, 16 May 2015 21:09:19 GMT

Вредно се подготвувавме и конечно го реализиравме нашиот натпревар. Седмоодделенците повторно изненадија со својата креативност, талент, подготвеност да се докажат и во драмскиот предизвик. На натпреварот учествуваа четири групи.

Прва група: Амела, Аделина, Киметка, Мухамед

Втора група: Мунира, Едина, Самија, Селма, Мухамиде

Трета група: Натали, Ремзије, Фатима, Тамара, Бошко, Едип

Четврта група: Амзо, Селма, Самија, Мухамиде, Мејта, Максуд

Со едногласна одлука на публиката и жири комисијата, првото место и припадна на третата група со драматизацијата на приказната „Мрзливите ќерки“.

Благодарност до директорот Алил Рочи и наставникот Андре Петкоски кои внимателно следеа и дадоа придонес во конечната одлука.

Најдобрите две групи ќе учествуваат на приредбата по повод Денот на просветителите.

СЛОЖУВАЛКА - НЕВА НЕВИЧИЦА

Розе — Sat, 14 Feb 2015 16:43:08 GMT

ИДЕЈАТА НА ТЕКСТОТ „НЕВА НЕВИЧИЦА“

Погледнете го нашето образовно видео за „Нева Невичица“

Драги посетители! На следниот линк прочитајте како течеа часовите.

ОРГАНИЗАЦИЈА НА ЧАСОТ